Luke 6

1Da nabo holoŋ ha Sabato, aŋainno Yesu he lejifat honyie to hotuai module ŋagigilari ŋama, hifufua ette daha. 2Hati ette hilak Farisei hijo, “Jei lihuma itai higemita inne leinya hifahita lawak to holoŋ no Sabato?”

3Ette Yesu hitiraŋ isieja hijo, “Obe itai ehen hiram no Davide ifa ojo inyeja lowodo, ifa lowuon inyeja ho huwo illo honyieŋ? 4Aŋajiŋak isieja a hotui ha haji ho Hollum, ette ŋadumu imuneaha innafa lara hisiorita inno Hollum ette daha, ette hidofe ŋaisiere hinnak do huwo illo honyie a tanhya, hati hido inyie hifahita ojo odua imune nyia do huwo sabak, arari fadirisen hamai ladaha.” 5Ette inyeja hijo do hosie, “Ara Lenyi ho tihoni Habu lo Sabato.”

6Ifa da far nabo no Sabato, ajiŋak Yesu de Sinagog ette hitiyena huwo. Owon lobo tihoni lo logulo hana ne idahit. 7Ojo haitiyenak he hifahita ho Farisie hiriria binno, hiwak wolo hijo heitilib iso tihoni lobo to Sabato, ette hoisie ŋarumu hipali ne leitisiahari inyeja. 8Hati eyen inyeja higigillo no hosie ette hijo do tihoni le logulo hana, “Totei a hide, toweite inni de hiji ho huwo daŋ.” Dee odoto tihoni le a hide, ette weita.

9Ette Yesu hijo do hosie, “Efi naŋ itai, aŋettek hifahita to Sabato anyar legem ilibiti kuya iruti, ŋhatilahu manya kuya hitihar manyaŋ?” 10Ette inyeja riŋa do hosie daŋ ette hijo do tihoni le, “Itibisak hana nohoi.” Ette tihoni le higem, ette hana no honyie liboi. 11Ette isieja hifut ho jore, ette isieja hiriota hijo hehum iso iyohoi Yesu jei.

12Ifa far nabo do holoŋi nuhe, aŋaino Yesu a doŋe lo mojori. Odulei inyeja harie daŋ mojo do hollum. 13Ifa leira far, elilloŋo inyeja lejifat do honyie, ette inyeja ŋanyimu isieja tomon harik, illafa efurek inyeja hijo “lefahat”.

14Fureta inne lefahat ara Simone (ara hido Peturu) ha harasi honyie Andrea, Yakobo, Yoane, Pilipo, Bartilimeyo, 15Mateyo, Tomaso, Yakobo Lenyi Alfeyo ho Simone (Lafa lelilloŋo hijo Sillot), 16Yuda Lenyi Yakobo, ette Yuda Iskariote lafa letinyaŋai Yesu.

17Ette Yesu ŋarubu to doŋe hosie daŋ ette weita do bur. Owon ifa iluluŋ no lobolo ne lejifat honyie de, ojo hidofe iluluŋ no huwo te Yudea he Yerusalem ojo hido to holoroŋ ha hari no Yaya ho Sidon. 18Afanu isieja hitira inyeja ojo anyar etilib isieja te iŋweiti. Ojo huwo ille letigema loyirihen inno lebot hidofe liboi. 19Awak ifa huwo daŋ hitir inyeja, nyo ottu ifa duaran to kwan honyie ette hitilib isieja daŋ,

20Ette inyeja riŋa de lejifat honyie ette hijo, “Ojok iso itai lociaŋak, ara Lobie no Hollum na hatai! 21Ojok iso hidofe itai huloŋ liwodo Eina, ifoŋi iso itai! Ojok iso itai hulon liyoo Eina; nyo illohita iso itai!

22Ojok iso itai hulo leyalai huwo, le fuhei huwo ade tehiji hosie, lemoro itai, ette hido hituruo fureita inna hatai, to rori inno Lenyi tihoni! 23Itimune hidofe isahuta, hijo ira dede, nyo, oboro iso hisiorita da hatai de ido. Nyo, ebo ifa hohonyiok hosie haikilak illo Hollum ani.

24Hati oru iso binno da hatai ha hasamak, hijo iruma itai munei Eina. Oru iso hido binno da hatai ille ifoŋi Einna! Nyo, ifuo iso itai wodoi. 25Oru iso da hatai ille lillohita Eina! Ifwo iso itai yo ette molo.

26Orru iso da hatai letahuo huwo itai! Nyo ehuma ifa hohonyieok hosie haikilak talerok ani.

27Hati ajo naŋ da hatai ille litira, itimunei merok hatai, hidofe ihuma ana lanyar do huwo ille leliwari itai. 28Itijak huwo ille lipit itai hidofe imojo do huwo ille letigema itai.

29Lanaŋ tihoni logul nohoi, isiere hido inyeja logul nabuettei. Lodumu tihoni kout nohoi, isiere hido dohonyie gamis nohoi. 30Isiere tihoni sehi ne lefi inyeja, leyari tihoni sehi nohoi, idek do honyie.

31Iya liwak itai huwo ehuma da hatai, ehuma do hosie daŋ ani. 32Hati limuno itai huwo ille lemuno itai, hirrumu iso itai nyo tere hosie? Hido omuno hayak huwo illo lomuno isieja. 33Lihuma itai ana lanyar do huwo ille le huma ana lanyar da hatai, hirruma iso itai nyo tere hosie? Hidofe hayak ehuma ani. 34Liluahak itai saŋ innahatai do huwo ille liyen itai hijo enyiehak iso dahatai, irumu iso itai nyo tere hosie? Hidofe oluha hayak saŋ da hayak, ette hitila ŋanyahu saŋ innohonyie.

35Hati itimunei merok illahatai ette itai hihuma isieja ana lanyar. To luahak do hosie, idek haigigillo ŋainyahu saŋ tere hosie, nyo oboro iso hisiorita innahatai. Ira iso itai Lenyirok ho Hollum tehide, nyo ara inyeja le lemehini do huwo ille lenyia lojo humo ho huwo illo loru. 36Itimehini iya lemehini Monye hatai.

37Idek haiŋot, anyar honyie lobe oŋotok do hoi. Idek haiŋot hipalita inno huwo, anyar honyie innohoi logoto. Ibusak hapalita inno huwo, ette innohoi ŋaibusahini.

38Isiere do huwo, ette ŋaisiere da hatai. Hisiori ne lefut sudu, oduhori ette ŋaitaŋahini do murosi hatai. Ikemit ne likemari itai, ekema iso itai te ekemit te nyie.

39Ette inyeja ŋailimak isieja hitiriami. “Heremik tihoni loŋodo ŋaidihori tihoni lo loŋodo? Kuya le dihori, eremik isieja daŋ ŋahuye aiwudo, honya fa isieja? 40Obe hejufani loboro tere ha hatiyanani honyie, hati leitiyen tihoni daŋ, ette cialai iya hatiyanani lo honyie.

41Nyo liriŋa iye do hujuti letiŋ no lowuon do honyiek ha harasi hoi, inya iye ligigilu hita ne to honyiek hoi? 42Jei lijo iye da harasi hoi, ‘Harasik, iko adumu naŋ hujiti ne to honyiek hoi,‘’ hati hido iye inya liwolo hita ne to honyiek hoi? Iyye haitimayahani! Todumu doo hita ne to honyiek hoi, ette iye wolo analanyar idumuni hati hujiti to honyiek ho mote hoi.

43Hati obe yani ne lelibo eŋorak haŋer inno lomura, obe yani no lomura egorak haŋer inne le libo. 44Hati eremik yani daŋ herini ta haŋer hosie. Obe itai lidia ŋaboro tere ha ŋaria, obe hidofe itai lidia haŋer inno fino tere hikua.

45Tihoni la lanyar, afanu ilibiti to lotunari ha taji honyie inno lelibo, ojo tihoni lo loru afanu irutioho ta taji honyie. Nyo ero hutuk rori inno lowuon da taji.

46Nyo le lilloŋo itai naŋ, ‘Habu, Habu’, ijo itai ibo hihuma rori inno elimak naŋ itaiŋ? 47Huwo daŋ ila afanu de iti, ette hitira rori inne iti egemari, ette naŋ ŋailimak itai he ciala jei. 48Owon iya tihoni le ledima haji, ette hibok fok no lowudo wir wir many eba do moruo ette ŋadimak haji da mai no logol. Lojo igura lotu ette hibul hiji, inya letadik haji no honyie, obe loworei, nyo emijak haji ŋaidimahini.

Hati tihoni le letiri rori inne iti obe eruk, owon iyya tihoni le ledimak haji dehide ho fau obe lobok ahotue fau. Lojo igura lebulak haji, ette haji ŋairibori ko kwak ette ruoro.”

49